آثام لا تغتفر

#آثام_لا_تغتفر

"كيفك دكتور شو أخبارك؟"
"اااه هلا هلا... ااه شو بتشكي؟"
"والله يا دكتور واجعني بطني وبيضرب لضهري وراسي واجعني ومرات كتير مش عارف أروح الحمام...."
"إنت شكلك معصب هالأيام... هاي حالة نفسية... بدك تروق حالك... بينفعش هيك..."
"بس يا دكتور حالة شو النفسية... والله موجوع ومش قادر..."
"يا زلمة قاعد بتحجج إنت عشان تاخد إجازة...مافيك اشي... خدلك حبة مسكن من هاد 3 مرات باليوم ورح تصير أحسن.."
********
غرفة تانية....

"السلام عليكم دكتورة.. "
"اه هلا اتفضلي وعليكم السلام... شومالك؟"
"والله يا دكتورة رقبتي منفوخة ومش قادرة أبلع وجسمي كله مكسر و...."
"اسمعي رح أحولك على مختص عشان نطمن أكتر"
"بس يا دكتورة ما إنتي مختصة"
"لا لا هداك تخصصه اشي تاني .. بدنا نطمن عليكي"

********

غرفة تالتة....

"مرحبا دكتور"
"أهلا" .... نظرة طويلة مستني الشكوى
"والله يا دكتور بنتي تعبانة مش عارفة شو مالها.. ما عم تاكل منيح ولا عم تنام منيح وبتضل تضرب على عينها وعينها مرات بتحول لجوا..."
"اوووف كل هاد... مافيها اشي البنت هيها بتلعب ... إنتي مكبرة الأمور عشان أول طفل..."
"بس يا دكتور... بنتي عينها بتحول... "
"وين بتحول يا بنت الناس... بتفولي عالبنت.."
"بس أنا يا دكتور بوصف وصف دقيق لحضرتك بحكم تعليمي..."
"يا بااااي منكم... عارفة... بيجيني واحد جاهل بيوصف وصف أدق من متعلمين كتار....  المتعلم بفكر حاله فهمان بكل شي.... رح تخليني بوصفك يروح بالي لاشي كتير خطير.. وهيها البنت مافيها اشي... اقولك... صوريلي ياها لما بتحول عينها لنشوف ونحكم عالموضوع... يلا الله معك..."
*********

*بعد أسبوع*

الغرفة الأولى

"الله يسامحك قلتلك روق حالك ... شوف اجاك قرحة وقولون عصبي وبوادر جلطة..."
المريض لنفسه "كل هاد صار بأسبوع بس؟ والأعراض كلها كانت كذب؟ حسبي الله بس..."
********

الغرفة الثانية

"مرحبا دكتور... الدكتورة فلانة حولتني عليك عشان عندي كذا وكذا...."
"امممم لا لا مافيكي اشي... الفحص مو مبينلي اشي... ها شوفي حتى... حركي رقبتك يمين وشمال... ابلعي ريقك... مافي اشي...خلص ارجعيلها... ولا اقولك.. روحي عند هالدكتور أحسن يمكن يعرف شو مالك... عالاقل نطمن..."
المريضة بعقلها "يعني كل واحد فيكم بيتفقس... كل واحد بحول عالتاني... ولا واحد طلبلي فحص حتى .... ما شاء الله بتعرفوا كل شي بالنظر....آخر مرة بروح الدكتور..."

بعد أسبوع تاني ... ماتت ... وما حدا شخصها ولا حدا أعطاها دوا مع إنها شافت أربع دكاترة

******

الغرفة التالتة....

"امممم أنا شفت الفيديو اللي بعتيه... عين البنت بتحول ...بس مافي اشي  عادي...عكل عشان نطمن عليها رح نحولها لدكتور عيون..."

أم البنت بتقول بعقلها " والله فضلت علي بهالتحويل.. منيح اقتنعت بالآخر.."

طبيب العيون قال لازم نظارة وبأسرع وقت وإلا بتسوء حالتها....

وبعد يومين البنت زادت الأعراض معها وطلعت مريضة وعندها التهاب بأدانيها وبتسنن

#مجلة_أفنان #أفنان_زعيتر #آثام_لا_تغتفر